فجر بريس
اليوم سلم عامل الرحامنة مجموعة من التجهيزات على فئة معينة من ولاد الشعب المقهور اللي لقاو أنفسهم في يوم من الأيام داخل أسوار السجن، قاليك هاد العمل تدخل في إطار إعادة إدماج السجناء في المجتمع كأنهم جايين من مجتمع آخر، حتى لهنا كلشي مزيان و المبادرة محمودة. من بعد الهيلالة اللي عرفتها عملية التوزيع كأنها إنجاز تاريخي، لحقيتاش دازت عمليات بحالها في وقت سابق، كانت الصدمة قوية ملي عرفو الناس بلي يا الله 11 سجين سابق اللي استفادوا من هاد العملية، في الوقت اللي كاين العشرات من أولاد الشعب اللي كتاب عليهم الحبس و عانقوا الحرية ما لاقيين حتى باش إعيشوا و دفعوا طلبات لهاد الجهة و لذيك الجهة، و لكن لا مجيب، بعض الظرفاء علقو على هاد الحدث باللي المندبة كبيرة و الميت فأر و كانت تشمل هاد العملية أكبر عدد من المستفيدين اللي منهم اللي مريض و اللي كيعيل أسرة… و علاش المبادرة الوطنية ما تعطي أولوية حقيقية بدل ذر الرماد في العيون لهاد الشريحة و في الآخر قالو هنيئا للمستفيدين، و الله يشوف من حال الباقين.
و الشيء المثير للجدل هو أن المبادرة الوطنية للتنمية البشرية عززت مكتبة السجن المحلي بمجموعة كتب، هادشي زوين باش يلقاو السجناء متنفس يعانقو فيه الحرية مؤقتا عبر الخيال، و لكن كان الأولى كذلك تسعى هاد المبادرة إلى تحسين الفضاء اللي كيعيشو فيه السجناء و تقدم ليهم معدات و أجهزة إلكترونية تعزز بيها التجربة السابقة اللي عرفتها هاد المؤسسة السجنية في عهد فريد شوراق حينما سلمهم سيارة إسعاف و مجموعة من الأجهزة كالثلاجات و الكليمات و الأغطية وهاد العملية سهرات عليها آنذاك جمعية عائشة أم المؤمنين.
